განსჯის შესახებ

   ძმამ უთხრა ამბა ანტონის: ილოცე ჩემთვის. მაგრამ ბერმა მიუგო: ვერც მე, ვერც უფალი ვერ შეგიწყალებს, თუ თავად არ შეიწყალებ თავს და ღვთისთვის სათნოდ არ იცხოვრებ.

 

 

* * *

ნეტარი ამბა არსენი ამბობდა: მონაზონი უცხოა უცხო ქვეყანაში; არაფერში არ უნდა ჩაერიოს და მაშინ იქნება მშვიდად.

 

 

* * *

ამბა აღათონმა თქვა: მრისხანე ადამიანმა მკვდარიც რომ აღადგინოს, ვერ სათნოეყოფა ღმერთს.

 

 

* * *

ამბა ათანასეს ჰკითხეს: როგორაა ძე მამის თანასწორი? მან უპასუხა: როგორც ორი თვალით ერთი ხედვა.

 

 

* * *

ამბა დანიელი ამბობდა: იმისდა კვალად, თუ როგორ ყვავილობს სხეული, სული იფიტება, სხეულის გამოფიტვის კვალად კი სული ყვავილობს.

 

 

* * *

ამბა ისაიმ თქვა: უბრალოება და საკუთარ თავზე ოცნების განგდება ბოროტი გულისსიტყვებისგან განწმედენ.

 

 

* * *

კიდევ თქვა: თუ ვინმე ძმას მზაკვრულად ექცევა, გულის ნაღველს ვერ გაექცევა.

 

 

* * *

კიდევ თქვა: ანგარება, პატივი და უზრუნველობა სიკვდილამდე ებრძვიან კაცს. მაგრამ არ უნდა დავნებდეთ მათ.

 

 

* * *

ამბა ისიდორე ამბობდა: თუ ცხონება გსურს, ყველაფერი გააკეთე, რასაც მისკენ მივყავართ.

 

 

* * *

ამბა ისააკ თებაიდელი ძმებს ეუბნებოდა: ნუ მოიყვანთ ბავშვებს; რადგანაც ბავშვების გამო სკიტში ხუთი ეკლესია დაცარიელდა.

 

 

* * *

ამბა პიმენმა თქვა: რა სარგებელია ააშენო სხვისი სახლი, საკუთარი კი დაანგრიო?

 

 

* * *

კიდევ თქვა: რა სარგებელია ხელოვნების სკოლაში იარო და არ დაეუფლო ამ მეცნიერებას?

 

 

* * *

ამბა პიმენმა კიდევ თქვა: ნუ იცხოვრებ იმ ადგილას, სადაც ხედავ, რომ შენი შურთ; სხვაგვარად ვერ წარემატები.

 

 

* * *

აგრეთვე თქვა: კეთილი გამოცდილება სიტყვებზე უპირატესია: ის ადამიანს უფრო დახელოვნებულს ხდის.

 

 

* * *

კიდევ თქვა: ვნებებს დამონებულ ადამიანში ღვთის ძალა ვერ დაივანებს.

 

 

* * *

კიდევ თქვა: თუ ჩვენ სიწყნარეს მიველტვით, ის გაგვირბის; ხოლო თუ გავურბივართ მას, მაშინ მოგვდევს.

 

 

* * *

ამბა იპერექიმ თქვა: ჭეშმარიტად ბრძენია ის, ვინც სიტყვით კი არ გასწავლის, არამედ საქმით მოძღვრავს.

 

 

* * *

ბერმა თქვა: რამდენადაც ავხორცობს სხეული, იმდენად სული არ ცნობს ღმერთს.

 

 

* * *

კიდევ თქვა: სულის სიჯანსაღისთვის საკმარისია ღვთის შემეცნება.

 

 

* * *

ბერმა თქვა: სიცრუე - ძველი კაცია, ხოლო ჭეშმარიტება - ახალი.

 

 

* * *

კვლავ თქვა: ჭეშმარიტება კეთილ საქმეთა ფესვია, ხოლო სიცრუე - სიკვდილი.

 

 

* * *

ბერმა თქვა: მონაზონმა არ უნდა ისმინოს ყოველგვარი საუბარი, არ უნდა იყოს მრავლისმეტყველი და მალე არ უნდა ცდუნდეს.

 

 

* * *

ერთ - ერთმა მამამ თქვა: უხეში სიტყვა კარგსაც აფუჭებს, თვინიერ სიტყვას კი ყველასთვის სარგებელი მოაქვს.

 

 

* * *

ბერმა თქვა: მონაზონი არა მხოლოდ უნდა ისმენდეს მცნებებს, უნდა აღასრულებდეს კიდეც.

 

წიგნიდან  „ძველი პატერიკი"